૩૮૦ - માંદાને સંતનાં દર્શન કરાવવાં જોઈએ

એક દિવસ રાત્રે બે વાગ્યે બાપાશ્રી મંદિરના દરવાજાના મેડા ઉપર આસને સૂતા હતા, તે જાગ્યા ત્યારે સ્વામી ઈશ્વરચરણદાસજીએ પૂછ્યું કે, ‘કેમ હજી જાગો છો?’ ત્યારે થોડી વાર તો બાપાશ્રી બોલ્યા જ નહિ, પણ પછી કહ્યું જે, ‘માનકૂવામાં જાદવજી નામના છોકરે હમણાં દેહ મેલ્યો, તેને ધામમાં મૂકી દીધો, એનો વિચાર કરું છું કે, તેના બાપે તમારા જેવા સંતોનાં સહેજે દર્શન થતાં હતાં તોય ન કરાવ્યાં, તે બહુ મોટી ભૂલ કરી. માંદાને તો સંતનાં દર્શન અવશ્ય કરાવવાં જોઈએ. એણે દેહ મૂક્યો ત્યારે પણ કોઈ પાસે નહોતું. મહિમા વિનાનું કામ આવું છે!’ એમ કહીને પછી થોડી વાર સૂતા.